Offagne

Offagne en photos ...


 


La vatche d'ofagne

C'estot à Ofagne, tin dou mwet d'octôb.
Les-oumes à pèrbrès, les fam's, enl'vant'n rôbe,
Traouvaint qu'i vjot tchô-è'lavaint raison.
On e-avot mète, padri eun'mwaijon,
Dedin in courti bin raclô, eun'vatche,
Chûr qu'ell'ne saurot n-aller à damatche.
La vla don tout'seûle - ce qu'ell'n'aimot ni ...
Ell'fwait deux trois cô le tour dou courtil.
Elle air grande è maigue, poï couleûr d'airp'sètche,
L'oeil vit è ardent, gueûl'fin coume in bètche,
Le cônes assez longues, le vint'petot plat :
C'estot coume in çairf, oh vraiment! c'vatch'-là.
Gn-avot bramin d'l'airpe, ell'plot z-a mwaindji;
Eune ot l'aurot fwait; li s'met à sondji ...
Rin de tout à war, pas'n âm' pou causer:
C'estot impossib' pour lî d's'amuser;
Tandis qu'se l't'chemin, padvant la mwaijon,
Si on plot y-aller, coume on z-aurot bon!
Mais le staule air clô, les pôrtes estaint clôses:
Pou pole sorte, lî falot out'chôse.
"Dje n'saurot, dit-elle, traverser padzou
pou z'aller ou tch'min; mais ça n'est ni tout:
Pouquwè ni padzeu? Dje montros se l'toit
E pi, coume on dit din certain patois;
Dj'deusval'ros padvant. Dje crois qu'ça pe s'fwair.
Coubin d'cô qu'djai vu l'pèr' Mitchot qu'y air!"
Le toit v'not fôrt bas : J'eusqu'ou dzeû d'ses pattes.
Sin min.m' s'avoï, in bon coume eun'gatte:
Là dl'devant qu'y est. ell'pèsteule eun'miette.
E pî cô in bond è l'y vla tout net'.
Gn'è croqué in pô, mais noss'vatche y est!
E la vla qui monte, la taiss'redressi.
S'ar'tant pa des cô in pô, pou rwaiti.
Elle estot binaiche, ell'waitot au lon,
Ell'reniflot l'air, qui sen.not sibon ...
La vla au mitan. Dzou ses patt's vla qu'ça craque!
Ell'wèt tout noir, ell'sint'in choc à l'estoumaque,
Ca s'davairt, ell'plondji'la taiss' la premîre
E teume à j'noux au mitan doul poussîre.
Ellee est là, stinde,n'sè ni  quwè ni qu'est-ce,
Ave 'n côn' cassée è eun'gerette à l'fesse.
Quand ses oeils s'ant ye abitié au noir,
Malgré la poûssire elle è pole war
Qu'elle estôt raclô de tous les costés :
Din in staul' si drole jamwai'l n'avot sté :
Gn-avot qu'pa la-hô qu'on plot war le ciel
Tout bleun, sin neuyadjes, è les hirondelles ...
Noss'vatch' misairot, elle' se d'mandaot bin :
"Usque dj'se? Est-c'la fin dou mond'qui vin?"
Aïe on vint, mais c'nest ni la fin dou monte:
C'est la fam'qu'è oye yauque è qui monte.
"Jour de Dje! Eun'vatche!" crie-t-elle à s'sauvant.
Ell'va outchi s'n-oume, tous les deux rev'nant
E i compeurant l'mystair des mystairs:
La vatche avot v'ne "par la voie des airs".
I vjant v'ne des djens pou les-y d'mander
s'i n'couniraint ni l'moïen d'la r'tirer.
"L ne saurot nn-aller d'padûs' qu'il devint,
Ni pau z-escaliers : il faut la tirer d'din!"
Dit-i yinqu'. "Taiste, dit-i 'nôt, t'es dô!
I gn-è qu'à trawer le meur assez hô:
Dje la frant passer pad'din la travûre : 
In cô là, ell'sôtrait à l'gran', c'est chûr."
On traw'l'entrefend, è des djairp's à l'grangne.
Devant la mwaijon, tous les cî d'Ofagne
Qui savaient l'afwaire causaient è riant.
Mon.né pa cinq oumes, là noss'vatch'qui vint.
Ou dvant doul travûre, ell's'arête tout net;
Là l'plantchi qui craque! On la poûss'bin red
E la v'la enbas. Les djens la rwaitaint, 
Elle'rewait'les djens. Ses deux oeils estaint
Tous zbarés, sa pôf côn cassé saignot,
Doul poussî elle a portot mwaint'kilos.
Mais 'll' air fièr quand min.me, a ratant ou staule
D'awer mî qu'les-oumes, sin s'serve d'eun' chaule,
Moinsté des in toit è rev'ne en bas.
Qué vatch'qui s'vantrot d'in pareil exploit? 

O.P. (1921)

La graphie adoptée est inspirée en grande partie de l'orthographe de Feller

Voir "Luxembourg Toujours" 2/2001, p19-21